«Ностальгия» сөзінің мәнін адамдар көп ретте тек мұңды мағынада деп ұғады. Алайда, ностальгия жүрек ауыртатын мұңнан ғана емес, өткен күндерге деген сарғайған сағыныштан да тұрады.

Биылғы бұл жарқын жүздесулердің жөні тіпті бөлек болды десек, асыра айтқандық болмас. Себебі біздің сүйікті оқу ордамызды осыдан жарты ғасыр бұрын бітіріп шыққан 10-шы түлектер ҚММУ қабырғасында бір-бірімен жүрек кернеген зор сағынышпен қуана қауышты. 50 жыл бұрын бітіріп шыққан оныншы түлектер! Қос мерейтойлы осы қуаныш иелерінің шалқыған көңіл-күйлері бұл күні арнадан асып төгілгендей болды. Даналық пен балалық көріністерге толы кездесу кеші болды бұл. Жан толқытарлық осы ғажайып кездесу кешін ұйымдастырушы – медицина ғылымының докторы, ҚММУ құрметті профессоры Тельман Зейноллаұлы Сейсембеков.  

Кездесуге жиналған курстастар өздерінің тым алыста қалған студенттік жылдары жайлы тебірене әңгімеледі. Өмірден озған достарының есімдерін еске алып, олардың рухына тағзым етті. Жалындаған жас шақтарының қызықты да жарқын сәттерін сағынышпен ортаға салды. Олар біздің оқу орнының тұңғыш ректоры П. М. Поспелов пен басқа да көптеген ұлағатты ұстаздарының есімдерін үлкен ризашылықпен еске алды. Ал келесі күні ҚММУ акт залында түлектер кездесулері одан әрі жарасымды жалғасын тапты.  Бұл туралы газетіміздің алдағы сандарында кеңірек баяндайтын боламыз.

Vivat academia!